१६ भदौ । कतार सरकारले १२ वर्षपछि गैरकानुनी हैसियत (खल्लीबल्ली) भएका कामदारलाई स्वदेश फिर्न दिएको आममाफी प्रक्रियामा सहभागी हुने क्रम बिहीबार स्थानीय समय अनुसार २ बजे (नेपालको ५ बजे) बाट सुरु भएको छ ।

कतारस्थित नेपाली दूतावासले यो प्रक्रियामा सहभागी हुन सम्पूर्ण त्यस्ता कामदारलाई अनुरोध गरेको छ । दूतावासले कतारमा क्रियाशील संघसस्थालाई यो प्रक्रियामा सहभागी गराउन आफ्नो भूमिका खेल्न समेत आग्रह गरेको छ ।  

कतारको आन्तरिक मन्त्रालयका अनुसार बिहीबार (१, सेप्टेम्बर) बाट यो आममाफी आउँदो १ डिसेम्बरसम्म लागू हुनेछ । मन्त्रालयले आममाफी प्रक्रियामा सहभागी भएर जाने कामदारलाई वैध राहदानी, राहदानी नभएकालाई दूतावासद्वारा जारी ‘ट्राभल डकुमेन्ट’, मिति उल्लेख नभएको टिकट र आइडी (पतका) वा आइडीको फोटोकपी लिएर आउन अनुरोध गरेको छ ।

ती कामदार आइतबारदेखि बिहीबारसम्म स्थानीय समय अनुसार दिउँसो २ बजेदेखि राति ८ बजेसम्म निवेदन लिनेछ ।  मन्त्रालयले सनैया-२ स्थित खोज तथा अनुसन्धान विभाग (नेपालीले सिआइडी भनेर चिन्छन्)मा गएर आवेदन दिन अनुरोध गरेको छ । उसले आवश्यक प्रक्रिया पुरा गरी तीन दिनभित्र कतारबाट निस्कन ‘एक्जिट परमिट’ दिने जनाएको छ । त्यसरी स्वदेश फिरेका कामदारले दुई वर्षअघि फेरि कतारमै रोजगारका लागि आउन पाउनेछन् ।

यसरी हुन्छ काम
खल्ली भएका कामदारहरु सिधैं खोज तथा अनुमगन विभागमा जान पाउछन् । आफ्नो भनाई राख्न असहज हुने कामदार सब्जी मार्केट नजिक रहेको नेपाली दूतावासमा गए सहज हुन्छ । दूतावासले ती कामदारलाई सहजीकरण गर्न छुट्टै डेस्कको व्यवस्था गरेको छ । कामदारको सबै विवरण बनाएर अरबी भाषामा एउटा पेपर बनाइदिन्छ । त्यो पेपर लिएर सिआइडीमा गए सजिलो हुन्छ ।

राहदानी नभएका कामदारलाई सिआइडीले छानबिन गरेर स्वदेश पठाउने निश्चित भएपछि मात्रै ट्राभल डकुमेन्ट बनाउन दूतावासमा पठाउँछ । सिआइडीले लेखेको कागज दूतावासमा देखाएपछि दूतावासले ट्राभल डकुमेन्ट बनाइदिन्छ । त्यो डकुमेन्ट लिएर पुन सिआइडी गएपछि उसले हवाई टिकटको मिति निश्चित गर्न लगाउँछ । त्यसपछि स्वदेश फिर्ने टुंङ्गो लाग्छ । नेपाली दूतावासले खल्लीबल्ली कामदारलाई यो प्रक्रियामा सहभागी गराउन आवश्यक सहजीकरण गर्ने जनाएको छ ।

बोक्नुपर्ने कागजात

•     वैध राहदानी
•     राहदानी हराएका वा कम्पनीले दिएको अवस्थामा दूतावासद्वारा जारी ट्राभल डकुमेन्ट बोक्ने
•     आवेदन जारी गरेको तीन दिनपछि ‘ओपन टिकट’ वा आरक्षित टिकट बोक्ने । सकभर ओपन टिकट लिएर निवेदन दिँदा राम्रो हुन्छ ।
•     आइडी कार्ड वा यसको फोटोकपी