एक लाख राशिको एमपीएल कात्तिकमा
विद्यानन्द विक्की
राजविराज, १३ भदौ । मधेशका जिल्लामा भएका क्रिकेट खेलाडीहरुलाई प्रोत्साहन गर्ने उद्देश्यले सुरु गरिएको मधेश प्रिमियर लिग (एमपीएल) को दोश्रो चरणको खेल कात्तिकमा हुने भएको छ ।
आयोजक मधेशी इञ्जिनियर स्टुडेन्ट युनियन (मेसु) ले सोमवार राजविराजमा पत्रकार सम्मेलन गरी दिएको जानकारी अनुसार कुल १५ लाख खर्च अनुमान गरीएको लिगमा वढिमा १६ वटा टिमले सहभागिता जनाउँने छन् । नकआउट आधारमा खेलाइने प्रतियोगितामा प्रथम हुने टिमले १ लाख १ हजार र दोश्रो हुने टिमले ५१ हजार पुरस्कार पाउने आयोजक मेसुका अध्यक्ष संजीव नारायण यादवले जानकारी दिए ।
अध्यक्ष यादवका अनुसार लिग अन्तर्गतका म्यान अफ दि सिरिजलाई एलईडी–टीभी, म्यान अफ द म्याचलाई कप, वेस्ट बलर र व्याट्स म्यानलाई साइकल तथा टुर्नामेन्टको वेस्ट अलराउण्डरलाई ५ हजार नगद दिइने छ ।
कात्तिक २ गतेदेखि सञ्चालन हुने दोश्रो चरण अन्तर्गतको उद्घाटन खेल जनकपुरमा र समापन खेल राजविराजमा हुने आयोजक मेसुका सचिव अमित पाठकले पत्रकार सम्मेलनमार्फत जानकारी दिएका छन् ।
पत्रकार सम्मेलनमा पूर्व राष्ट्रिय क्रिकेट खेलाडी दिपेन्द्र चौधरी, एमपीएल क्रिकेट वोर्डका अध्यक्ष अभिनाष मण्डल, उपाध्यक्ष पवन दास लगायतले प्रतियोगिताको तयारीका बारेमा जानकारी दिएका थिए ।
