फिफाको बरियतामा नेपाल ६ स्थान माथि
काठमाडौं, फागुन १– विश्व फुटबलको सर्वोच्च निकाय फिफाले जनवरी महिनाको सार्वजनिक गरेको बरियतामा नेपाल छ स्थानमाथि उक्लदै १ सय ८० औं स्थानमा पुगेको छ ।
फिफा बरियताको शीर्ष स्थानमा रहेको जर्मनीले १ हजार ७ सय २९ अङ्कको साथमा पहिलो स्थानमा रहेको छ भने नेपाल ५५ दशमलव ४ अङ्कका साथ १ सय ८० औं स्थानमा पुगेको छ । यसअघि डिसेम्बरमा नेपाल ४९ अङ्कका साथ १ सय ८६ औँ स्थानमा थियो ।
दक्षिण एसियाली मुलुकमा सबैभन्दा माथि रहेको माल्दिभ्स चार स्थान तल झर्दै १ सय ३५ औँ स्थानमा पुगेको छ । यस्तै दुई स्थान तल झरी अफगानिस्तान १ सय ४४ स्थानमा र ८ स्थान माथि उक्लदै बङ्गलादेश १ सय ५७ औँ स्थानमा पुगेको छ ।
यस्तै भारत १ सय ७१ औं यथास्थानमा कायमै छ भने पाकिस्तानले आफूलाई १७ स्थान सुधार्दै भारतसँगको बरियतामा बराबरी गरेको छ । श्रीलङ्का १ सय ७३ औं स्थानमा र भुटान २ सय ९ औं स्थानमा रहेर विश्वमै सबैभन्दा पुछारमा परेको छ । विश्व च्याम्पियन जर्मनी शीर्ष स्थानमा कायमै छ ।
