सुनसरीको हरिनगरमा झडप : १६ प्रहरी र ७ प्रदर्शनकारी घाइते
सुनसरी — हरिनगर गाँउपालिका र देवानगञ्ज गाउँपालिका वडा नम्बर १ र ७ मा स्थानीय प्रशासनले निशेधाज्ञा जारी गरेपनि स्थिति सामान्य बन्न सकेको छैन । हरिनगरको भुटाह बजार बिहानैबाट तनावग्रस्त बनेको छ । शुक्रबार मध्यान्ह १२ बजेबाट अर्को सूचना जारी नभएसम्मका लागि हरिनगर गाउँपालिकाको सबै वडा र देवानगञ्जको १ र ७ नम्बर वडामा निषेधाज्ञ जारी भए पनि स्थानीयले प्रदर्शन गरिरहेका छन् । स्थानीयले प्रदर्शन निरन्तर गरेपछि प्रहरीले गोली चलाउँदा दुई जना प्रदर्शनकारी घाइते भएका छन् भने प्रदर्शनकारीले प्रहरीमाथि ढुंगामुढाले आक्रमण गरेका छन् । झडपमा परेर १६ जना प्रहरी र ७ जना प्रदर्शनकारी घाइते भएको सहायक प्रमुख जिल्ला अधिकारी ओम भट्टराईले जानकारी दिए । उनीहरुको बिराटनगरका विभिन्न अस्पतालमा उपचार भइरहेको छ । बिहीबार एसईई परीक्षाको क्रममा हरिनगर गाँउपालिका-१ मा रहेको बालकृष्ण माविमा भएको कुटपिटपछि दुई समुदायका बीचमा तनाव बढेको हो । दुवै समूहका स्थानीयहरु झडपमा उत्रिएपछि शुक्रबार बिहानैबाट तनाव सिर्जना भएको हो । बिहीबार साँझ स्थानीय जीवन मेहतामाथि कुटपिट भएको थियो । कुटपिटपछि दुवै समूहका बीचमा झडप भएको थियो । झडपमा दुई प्रहरीसहित एक जना स्थानीय घाइते भएका थिए । स्थिति थप बिग्रन नदिन सो क्षेत्रमा निषेधाज्ञा जारी गरिए पनि अवस्था सामान्य बन्न नसकेको सुनसरीका साहयक प्रमुख जिल्ला अधिकारी भट्टराईले बताए ।
प्रशासनले शुक्रबार मध्यान्ह १२ बजेदेखि अनिश्चितकालीन कर्फ्यु जारी गरेको थियो । बिहीबारको आक्रमणबाट घाइते भएका हरिनगर गाउँपालिका-३ का जीवन मेहताको धरानस्थित वीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
